இலங்கையில் உள்ள பாதிக்கும் மேற்பட்ட பழக்கப்பட்ட யானைகள் தனியாருக்கு சொந்தமானவை என்பது தெரியவந்துள்ளது.
நாட்டில் 210 பழக்கப்பட்ட யானைகள் உள்ளன, அவற்றில் 102 தேசிய உயிரியல் பூங்காக்களில் உள்ளன, மீதமுள்ள 108 தனியாருக்கு சொந்தமானவை என வனஜீவராசிகள் அமைச்சர் குறிப்பிட்டுள்ளார்.
வனஜீவராசிகள் அமைச்சர் சிபி ரத்நாயக்க புதன்கிழமை நாடாளுமன்றத்தில் வனஜீவராசிகள் பாதுகாப்பு கட்டளைச் சட்டத்தின் கீழ் விதிகள் மீதான விவாதத்தைத் தொடங்கி வைத்து உரையாற்றுகையில் அவர் இந்த விடயத்தைக் குறிப்பிட்டுள்ளார்.
முன்னைய அரசு 49 தனியாருக்கு சொந்தமான யானைகளுக்கு எதிராகவும் சட்ட நடவடிக்கை எடுத்தது.
யானைப் பதிவை முறைப்படுத்தவும், புதிய சட்டம் மற்றும் நலன்களைச் செயல்படுத்தவும் 2020 அமைச்சரவை பத்திரத்தை சமர்ப்பித்துள்ளதாக அரசாங்கம் கூறியுள்ளது.
கடந்த அரசாங்கத்தால் யானைகள் நீண்டகாலமாக தடுத்து வைக்கப்பட்டிருப்பதால் யானைகளின் உரிமையாளர்கள் மற்றும் விலங்குகளின் உரிமையாளர்கள் துன்புறுத்தப்பட்டதாக அமைச்சர் குறிப்பிட்டுள்ளார்.
எதிர்காலத்தில் இதுபோன்ற சம்பவங்களைத் தடுக்க, யானைகளை முறையாகப் பதிவு செய்ய புதிய விதிகள் வகுக்கப்படும் எனவும், யானைகளை பழக்குவதற்கு புதிய விதிமுறைகள் தயாரிக்கப்படும் எனவும் அமைச்சர் கூறியுள்ளார்.
பழக்கப்பட்ட யானைகள் மீதான நீதிமன்ற அழுத்தத்தைக் குறைத்தல், சமூகத்தில் சர்ச்சைக்குரிய சித்தாந்தங்களைக் குறைத்தல், யானைகளின் நலன் மற்றும் விலங்குகளின் கொடுமையைத் தடுப்பது போன்ற நடவடிக்கைகளில் அமைச்சர் கவனம் செலுத்தவுள்ளதாக அரசாங்க தகவல் திணைக்களம் தெரிவித்துள்ளது.
சட்டவிரோதமாக யானை குட்டிகளை வைத்திருந்ததாக குற்றம் சாட்டப்பட்டவர்களுக்கு அவற்றை மீளளிக்க நீதிமன்றம் சமீபத்தில் உத்தரவிட்டது.
இலங்கையின் தேசிய விலங்கியல் பூங்காவின் காவலில் உள்ள 13 குட்டி யானைகளை, மீள கையளிக்குமாறு. மிருகக்காட்சிசாலைத் திணைக்களத்தின் பணிப்பாளருக்கு, கொழும்பு பிரதான நீதவான் நீதிமன்றம் உத்தரவிட்டது.
இந்த பின்னணியில் தேசிய விலங்கியல் பூங்கா திணைக்களத்தின் பணிப்பாளர் நாயகம் இஷினி விக்ரமசிங்க பதவி விலகவுள்ளதாக அறிவித்தார்.
இலங்கையில் கடந்த 2011ஆம் ஆண்டு யானை கணக்கெடுப்பு நடத்தப்பட்டது.
அந்த தரவுகளுக்கு அமைய, இலங்கையில் யானைகளின் எண்ணிக்கை 5,879 ஆகும். அவற்றில் தந்தங்களைக் கொண்ட 55 யானைகள் அடங்கும்.
